Abstract
Бұл мақалада 9-сынып оқушыларының функционалдық математикалық сауаттылығын контекстік тапсырмаларды жүйелі қолдану арқылы дамыту мәселесі қарастырылады. Зерттеудің мақсаты – білімді нақты өмірлік жағдаяттарда қолдануға, математикалық модель құруға, есептерді шешуге және нәтижелерді интерпретациялауға бағытталған әдістемелік жүйені әзірлеп, оның тиімділігін эксперименттік тұрғыдан бағалау. Зерттеуге 78 оқушы қатысты: эксперименттік топта – 38, бақылау тобында – 40 оқушы. Педагогикалық эксперимент 8 апта бойы 40 сабақ көлемінде жүргізілді. Бастапқы және қорытынды диагностика арифметика, пропорциялар мен пайыздар, алгебралық модельдеу және логикалық ойлау, өлшеу мен геометрия, деректер мен графиктерді талдау мазмұндық бағыттарын қамтыған тапсырмалар арқылы жүзеге асырылды. Нәтижелер Пирсонның χ² критерийі негізінде өңделді. Қорытынды бағалауда жоғары деңгейге жеткен оқушылар үлесі эксперименттік топта 47,4%, бақылау тобында 17,5% құрады; төмен деңгей көрсеткіштері тиісінше 15,8% және 42,5% болды. Топтар арасындағы айырмашылық статистикалық мәнді екені анықталды х^2=10,19;df=2;p=0,006. Алынған нәтижелер ұсынылған әдістеменің оқушылардың нақты жағдаяттарды математикалық тұрғыдан тұжырымдау, сәйкес әдістерді таңдап қолдану және алынған шешімдерді түсіндіру дағдыларын дамытуға тиімді ықпал ететінін көрсетті.