Abstract
Балалық шақ – адам баласының айнала қоршаған дүниені тани бастайтын кезеңі. Бұл адам өмірінің белгілі бір даму уақыты ғана емес, әр дәуірдегі, әр ұлт өкілдерінің әр текті әлеуметтік, мәдени, қоғамдық жағдай аясында қалыптасатын, ұлттың, халықтың келбетін, болашағын айқындайтын шақ. Әлеуметтанушылардың айтуынша, балалық шақ табиғи түрде өзінің болмысын жетілдіріп, қоғаммен белсенді қарым-қатынасқа түсіп отыратын қоғамның бір бөлігі. Балалық шақ - тарихтың өтуімен, әр түрлі мәдени-әлеуметтік аспектілерде ауысып отыратын құбылыс. Бұл кезең әлем халықтары әдебиетінде көптеген көркем туындыларға арқау болды. Мақаланың мақсаты - бала бейнесінің шындық өмірден алынып, көркем туындыдағы әлемге көшу арқылы қаламгердің өмір шындығын әлеуметтік орта мен дәуірге сай таңдап, саралану нысанын ашу. Сол арқылы көркем шығармадағы бала бейнесінен дербес тұлғаға биіктейтін толыққанды бейненің жасалуы жинақталады. Зерттеу нәтижесінде балалық кезеңде әлеуметтік ортаға бейімделе бастаған баланың белгілі бір өмір қағидаттарын, білім мен құндылыққа тиісті дағдыларды игеріп, жетілген тұлға болмысына айналу тәсілдері айқындалады. Ендеше, бала кейіпкер - әдеби шығарма кеңістігінде үнемі жетіліп отыратын динамикалы бейнеге айналады.