Abstract
Тіл ұлттың болашағы, тіл арқылы «қазақтың» болмысы сақталатындығы белгілі. Сондықтан әрбір қазақ тілі маманы тілдің өміршеңдігіне ықпал ететін барлық факторларды ескере отырып, өз үлесін қосқысы келеді. Жас ұрпақтың ана тілінің табиғатын толық біліп шығуына көмектесетін, мектеп қабырғасында оқушының он бір жыл бойы оқитын незігі пәні, «Қазақ тілінің» алатын орны ерекше. Бұл мақалада «ұлттық құндылықтар, тілдің табиғи ерекшелігін, болмысын сақтауға көмектесетін түрлі тапсырмалар қазақ тілі оқулықтарында қамтылуы міндетті ме?» және оқушының бойында қалыптастыратын дағдылардан бөлек, құзыреттіліктердің ішінде лингвомәдени құзыреттіліктің қаншалықты қажеттілігі бар екендігі жазылған. «Ұлттық брендтер арқылы лингвомәдени құзыреттілікті арттырудың тиімділігі қаншалықты?» деген сұрақтарға да жауап ізделеді. Аталған мәселені шешуде теориялық талдау, салыстырмалы-тарихи және сипаттау әдістері қолданылды. Лингвомәдени құзыреттілікті дамыту үшін түрлі әдістер ұсынылды. Көнерген ұлттық атауларды да жаңғыртып, брендке айналдыру мүмкіншілігінің бар екендігін, ал бренд болу үшін ол заттың қолданысын күшейтіп, тиімділігі мен қажеттілігін көрсету керектігі жайында жазылады. Оқушының бойында ұлттық брендтер арқылы лингвомәдени құзыреттілікті қалыптастыру тілдің жасампаздығы мен өміршеңдігіне және жас ұрпақтың ана тілінің құндылығын бойына сіңіріп өсуіне септігін тигізеді деген тұжырым жасалды.