Abstract
Бұл мақалада қазақ поэзиясының көкжиегін кеңейткен өрісті арна – әнші-ақындар мұрасының зерттеп-зерделену мәселесі қарастырылады. Әр кезеңдерде жазылып, осы бағыттағы зерттеулердің ғылыми-теориялық негізін құрайтын еңбектерге шолу жасалады. Сонымен бірге, зерттеу еңбектерінің әнші-ақындар поэзиясын танытудағы рөліне айрықша мән берілген. Сал-серілер мұрасын зерттеудің басында тұрған іргелі еңбектерге шолу жасалып, оларды топтастыруға жете мән берілді. Осы орайда әнші-ақындар шығармашылығына арналған еңбектерден бөлек, есімі мен мұрасы мәлім де беймәлім жекелеген өкілдерінің шығармашылығын тану, әнші-ақындар өнерін аймақтық дәстүрлі өнер мектептерінің ерекшелігіне байланысты қарастырып, дәстүр мен жалғастық мәселесін өрістетуге ден қойылды. Кеңестік солақай саясаттың насихаттау құралына айналып, әуел бастағы сөзі мен мәнінен ажырап қалған әнші-ақындардың әдеби мұрасының текстологиялық мәселелері қамтылған еңбектер де назардан тыс қалмады. Ғылыми мақалада жүйелі-кешенді талдау, салыстыру, топтау әдістері қолданылды. Әнші-ақындар шығармашылығын зерттеген ғалымдардың еңбектері мен зерттеулері бағыттарына қарай, тақырыптық-мазмұндық ерекшеліктеріне қарай бірнеше топтарға жіктелді. Бірақатар қорытындылар жасалып, сал-серілер мұрасын зерттеудің ғылыми-теориялық негізін құрайтын еңбектердің құндылығы мен халқымыздың рухани өміріндегі алар орны пайымдалды. Ғылыми мақаланың нәтижелерін әнші-ақындар мұрасын оқытуда, насихаттауда қолдануға болады. Сондай-ақ осы бағыттағы зерттеулердің бағытын айқындап, сал-серілердің өмірі мен шығармашылығына қатысты жүргізілетін зерттеу барысында басшылыққа алуға болады.