Abstract
Бұл мақалада оқылым әрекеті оқушылардың коммуникативтік құзіреттілігін қалыптастырудың маңызды тетігі ретінде қарастырылады. Жұмыс аясында отандық және шетелдік ғылыми зерттеулерге теориялық шолу жасалып, «құзіреттілік», «коммуникативтік құзіреттілік» ұғымдарының мәні айқындалған. Мақаланың өзектілігі қазіргі қоғамда оқушыны әлеуметтік ортада еркін қарым-қатынасқа түсе алатын тұлға ретінде қалыптастыру қажеттілігімен негізделеді. Зерттеудің мақсаты – қазақ тілі сабақтарында мәтінмен жұмыс істеу барысында белсенді әдіс-тәсілдерді қолдану арқылы 8-сынып оқушыларының оқылым дағдыларын дамыту және олардың коммуникативтік құзіреттілігін қалыптастыру жолдарын ғылыми-практикалық тұрғыдан негіздеу болып табылады. Тәжірибелік-эксперименттік зерттеу жұмысы жалпы білім беретін мектептің 8-сынып оқушылары арасында жүргізіліп, оған барлығы 80 оқушы қатысты. Мақалада қазақ тілі сабақтарында мәтінмен жұмыс барысында қолданылатын Жигсо (Jigsaw), дискуссия, дебат әдістерінің қолдану алгоритмі мен олардың практикалық нәтижелері талданған. Зерттеу нәтижесінде оқылымның тек дайын ақпарат көзі ғана емес, сонымен бірге оқушылардың өзара пікір алмасу, сұхбат құру, өз ойын анық әрі еркін жеткізу және өзіндік көзқарасын дәлелдей білу қабілеттерін дамытатын басты құрал екені дәлелденді. Мектепте оқылым дағдыларын арттыруға бағытталған тапсырмалар белсенді әдіс-тәсілдермен жүйелі ұйымдастырылған жағдайда, оқушылардың коммуникативтік құзіреттілігі жоғары деңгейде қалыптасатындығы айқындалды.