Abstract
Мақалада рекуперациялық тежеу циклдерінің параметрлеріне негізделген электрлік жылжымалы құрамның (ЭЖҚ) борттық энергия жинақтағыштарының массалық-габариттік сипаттамаларын негіздеу мәселелері қарастырылған. Зерттеу барысында энергия жинақтағыштарды моторлы вагонның рама астындағы бос кеңістігіне орналастырудың оңтайлы нұсқасы ұсынылды. Литий-ионды аккумуляторлық модульдердің қажетті санын есептеу әдістемесі әзірленіп, жүйенің жиынтық массасы мен көлемдік көрсеткіштері анықталды. Ansys Workbench бағдарламалық кешенін пайдалану арқылы жабдықты орнатудан кейінгі вагон рамасының кернеулі-деформацияланған күйіне (КДК) сандық талдау жүргізілді. Модельдеу нәтижелері конструктивтік беріктіктің сақталуын және осьтік жүктемелердің нормативтік талаптарға сәйкестігін растады. Сонымен қатар, базалық және модернизацияланған электропойыздың пайдалану көрсеткіштеріне салыстырмалы талдау жасалды. Алынған нәтижелер борттық жинақтағыштарды енгізу тарту жүйесінің ПӘК-ін 16,6%-ға арттырып, энергия шығынын 17,5%-ға азайтуға мүмкіндік беретінін көрсетті.