Abstract
Аталған мақала төрелік дауларды қарау және шешу барысында дәлелдемелерді ұсыну мен зерттеуге арналған. Бүгінгі таңда төрелік талқылауда тараптардың ұсынған дәлелдемелері істің дұрыс әрі объективті қаралып, шешілуіне елеулі әсер етеді. Төрелік дау туындаған кезде талап қоюшы талап арызын негіздеу үшін оған тиісті дәлелдемелерді қоса береді. Төрелік дауларды қарау және шешу барысында дәлелдеу көбіне тараптардың өз талаптары мен қарсылықтарын негіздеуге бағытталады. Тараптардың дәлелдемелерді ұсынуы және оларды зерттеу жарыспалылық қағидатының негізгі көріністерінің бірі болып табылады. Төрелік талқылауда тараптардың ұсынған дәлелдемелері жан-жақты зерттеліп, объективті бағаланғаннан кейін ғана шешім қабылданады. Сонымен қатар, автор төрелік талқылауда іс бойынша ұсынылған дәлелдемелерді бағалаудың маңыздылығына назар аударады. Азаматтық-құқықтық дауларда көбіне құжаттардың шынайылығы, келісімдерге заңсыз өзгерістер енгізілуі, міндеттемелердің орындалмауы және өзге де мән-жайлар қарастырылады. Осыған байланысты төреші тараптардың әрбір ұсынған дәлелдемесін өзінің ішкі сенімі негізінде бағалауы қажет. Төрелік талқылауды цифрландыру жағдайында электрондық дәлелдемелерді пайдалану барған сайын кеңінен қолданылып келеді. Бұл төрелік талқылаудың жеделдігіне, объективтілігіне және ашықтығына оң әсер етеді. Қағаз түріндегі дәлелдемелерді өңдеу көп уақытты талап ететіндіктен, электрондық дәлелдемелердің негізгі артықшылықтарының бірі – дауларды қарау мерзімдерін қысқарту және ұсынылған материалдарды жедел зерделеу мүмкіндігін қамтамасыз ету болып табылады.