Abstract
Ғылым мен техниканың жетістіктері салдарынан ХХІ ғасырдағы заманауи адамның қозғалысы шектелген. Ол баратын жеріне көлікпен жетеді, жұмысын компьютерде орындайды, азық-түлікті тапсырыспен алдырады, тіпті үйін роботтың көмегімен жинайды. Осындай қозғалыс тапшылығы адамның тәні мен жанының саулығына кері әсерін тигізеді. Халық аузындағы «Өмір – бұл қозғалыс» ұранының орындалуы қиындап тұр.Физикалық белсенділік төзімділік пен өнімділікті арттырады, ми жұмысын жақсартады және денсаулықты күшейтеді. Эндорфиндердің – қуаныш гормондарының өндірісін ынталандырады, егер адам қатты күйзеліске ұшыраса, олардың қажеттілігі арта түседі. Жалпы бақуаттылық пен көңіл-күйді жақсартады, депрессия мен дүрбелең шабуылдарын жеңуге көмектеседі.Осы зерттеуде адамның физикалық белсенділік деңгейі мен эмоциялық интеллектісінің байланысы қарастырылды. Эмоциялық интеллект – эмоцияларды дәл тану, анықтау және түсіну қабілеті, шамадан тыс күшті эмоциялардың қарқындылығын бақылау, эмоциялардың сыртқы көрінісін реттеу және қажетті эмоцияларды өз еркімен тудыру мүмкіндігі ретінде анықталады. Физикалық белсенділік эмоциялық интеллектіні дамытатын көптеген көрсеткіштердің бір ғана факторы болып табылады, бірақ оның адамның психологиялық бейімделуінде және денсаулығының жақсаруында маңызы жоғары.