Abstract
Созылмалы сенсоневралды есту қабілетінің жоғалуы (ССНЕҚЖ) қазіргі оториноларингологиядағы өзекті медициналық және әлеуметтік мәселелердің бірі болып табылады. Аурудың патогенезінің күрделілігі мен емдеу нәтижелерінің шектеулілігі тиімді терапиялық тәсілдерді іздестіруді талап етеді. Осыған байланысты физиотерапиялық технологияларды кешенді емдеу құрамында қолданудың клиникалық тиімділігін бағалау ерекше қызығушылық тудырады. Зерттеудің мақсаты – тамырлы этиологиялы созылмалы сенсоневралды есту қабілетінің жоғалуын емдеуде «Аудиотон» және «Тонзиллор» физиотерапиялық құрылғыларын кешенді қолданудың тиімділігі мен қауіпсіздігін бағалау. Зерттеуге жасы 40–53 жас аралығындағы тамырлы генезді созылмалы сенсоневралды есту қабілетінің жоғалуы бар 62 пациент енгізілді. Перспективалық клиникалық зерттеу аясында барлық науқастарға стандартты фармакотерапиямен қатар «Аудиотон» және «Тонзиллор» құрылғыларын қолдану арқылы кешенді ем жүргізілді. Есту функциясының динамикасы таза тондық аудиометрия әдісімен ем басталғанға дейін, емдеу аяқталғаннан кейін және 1 айлық бақылау кезеңінде бағаланды. Нәтижелер. Емдеудің 5–6-күнінен бастап пациенттердің басым бөлігінде естудің субъективті жақсаруы және құлақтағы шудың қарқындылығының төмендеуі байқалды. I және II дәрежелі созылмалы сенсоневралды есту қабілетінің жоғалуы бар науқастарда 3, 4, 6 және 8 кГц жиіліктерде есту табалдырығының статистикалық тұрғыдан маңызды төмендеуі анықталды, жақсару көрсеткіші орта есеппен 14–17 дБ құрады (p<0,05). III дәрежелі ССНЕҚЖ бар пациенттерде аурудың үдемеуіне және клиникалық жағдайдың тұрақтануына қол жеткізілді. Құлақтағы шудың қарқындылығы 62 пациенттің 53-інде (85,5%) төмендеді. Толық аудиологиялық қалпына келу жағдайлары тіркелмегенімен, кешенді емдеу әдісі дәстүрлі фармакотерапиямен салыстырғанда жоғары клиникалық тиімділікті көрсетті. Қорытынды. «Аудиотон» және «Тонзиллор» физиотерапиялық құрылғыларын кешенді қолдану тамырлы этиологиялы созылмалы сенсоневралды есту қабілетінің жоғалуын емдеудің қауіпсіз, инвазивті емес және клиникалық тұрғыдан тиімді қосымша әдісі болып табылады. Бұл емдеу тәсілі микроциркуляцияны жақсарту, дәрілік заттардың тіндерге жеткізілуін күшейту, қабынуға қарсы әсер ету және есту анализаторының функционалдық жағдайын қалпына келтіру сияқты бірнеше патогенетикалық механизмдер арқылы жүзеге асады. Ең жоғары терапиялық тиімділік аурудың ерте сатыларында және клиникалық симптомдардың ұзақтығы қысқа болған жағдайда байқалды. Алынған нәтижелер созылмалы сенсоневралды есту қабілетінің жоғалуын кешенді емдеу алгоритміне аталған физиотерапиялық әдістерді енгізудің клиникалық орындылығын көрсетеді.