Abstract
Мақалада жоғары оқу орны студенттерінің кəсіби өзін-өзі тануына бірегейліктің ықпалы эмпирикалық жəне теориялық тұрғыда зерттеледі. Зерттеудің мақсаты –тұлғаның кəсіби өзін-өзі тануы құрылымындағы бірегейліктің рөлін жəне оның мотивациялық-белсенділік, құндылық-мағыналық көрсеткіштермен байланысын анықтау. Зерттеуге Астана қаласындағы ЖОО-да білім алатын 1–2 курс студенттері, барлығы (n=90) қатысты. Іріктеу мақсатты түрде жүргізілді. Зерттелуші студенттердің жыныстық құрамы: 52 қыз, 38 ұл.Зерттеу əдістері ретінде А.В. Лазукин (Н.Ф. Калин бейімдеген) «Тұлғаның өзін-өзі белсендіруін диагностикалау» əдістемесі жəне Д.А. Леонтьев бейімдеген «Мағыналы өмірлік бағдарлар» тесті қолданылды. Деректерді өңдеуде Манн–Уитни U-критерийі пайдаланылды.Нəтижелер 2 курс студенттерінің «Өмірдегі мақсаттар» (U=742, p=0,021), «Мен –бақылау локусы» (U=768, p=0,034) жəне жалпы мағыналылық көрсеткіштері бойынша (U=715, p=0,018) статистикалық мəнді айырмашылықтарға ие екенін көрсетті. Бұл олардың кəсіби болашаққа бағытталуы мен субъективті бақылау деңгейінің жоғары екенін дəлелдейді. Алынған нəтижелер кəсіби бірегейліктің тұлғаның кəсіби өзіндік санасының, мотивациясының жəне өмірлік мағына құрылымының қалыптасуындағы маңызды психологиялық фактор екенін айқындайды.