Abstract
Мақала мазмұнында қазіргі әлеуметтік үдерістердің трансформациясы жағдайында жастар ортасында көшбасшылықтың қалыптасу және байқалу ерекшеліктері қарастырылады. Зерттеудің өзектілігі жастардың қоғамдық өзгерістердің белсенді субъектісі ретіндегі рөлінің артуымен және жастардың әлеуметтік әрі кәсіби тұрғыда табысты өзін-өзі жүзеге асыруына ықпал ететін көшбасшылық қасиеттерді қалыптастыру қажеттілігімен негізделеді. Зерттеудің мақсаты – әлеуметтік белсенділік контексінде жастар көшбасшылығы феноменіне теориялық талдау жасау және білім алушылардың көшбасшылық әлеуетін дамытуға ықпал ететін факторларды анықтау. Зерттеу әдістері ретінде ғылыми әдебиеттерді талдау және жинақтау, салыстырмалы және жүйелік тәсілдер, сондай-ақ теориялық модельдеу әдісі қолданылды. Зерттеу нәтижесінде әлеуметтік белсенділіктің жастар ортасында көшбасшылық қасиеттерді қалыптастырудың негізгі шарты екені, ал оқудан тыс және қоғамдық қызметтің оларды дамыту үшін ең қолайлы орта қалыптастыратыны анықталды. Жастар ортасындағы көшбасшылықтың контекстуалдық сипатқа ие екені және оның топтық қызметтің ерекшеліктерімен, тұлғаның субъектілік деңгейімен және әлеуметтік ортаның сипаттарымен айқындалатыны көрсетілді. Жұмыстың практикалық маңыздылығы алынған қорытындыларды жастар саясаты, тәрбиелік жұмыс және білім беру ұйымдарында білім алушылардың көшбасшылық әлеуетін дамыту бағдарламаларын әзірлеуде қолдану мүмкіндігімен айқындалады.