Abstract
Бұл ғылыми мақалада лингвоаксиологияның өзекті ұғымдарының бірі — құндылық категориясының мәні мен оның тілдік жүйедегі орны қарастырылады. Лингвоаксиология тіл мен мәдениеттің өзара байланысын зерттейтін сала ретінде тілдегі құндылықтардың, моральдық және эстетикалық бағалаулардың қалай бейнеленетінін түсінуге мүмкіндік береді. Мақалада құндылық категориясының тіл арқылы қалай құрылатыны, оның түрлі әлеуметтік және мәдени контекстегі ерекшеліктері талданады. Тіл мен ойлау жүйесінің бірлігі, әлеуметтік идеологиялардың және ұлттық сана-сезімнің тілдегі көріністері де осы тақырып аясында қарастырылады. Сонымен қатар, құндылықтың тіл арқылы берілуін зерттеу барысында, сөздер мен фразеологизмдердің, метафоралар мен тұрақты тіркестердің тілдік құндылықтарды қалай бейнелейтіні, олардың ұлттық дүниетаным мен мәдениеттің қалыптасуына әсері туралы мәселелер қозғалады. Мақалада лингвоаксиология саласының қазіргі зерттеулері мен теориялық тұжырымдары ұсынылып, тілдің қоғамдық және мәдени құндылықтарды сақтау мен жеткізудегі рөліне көңіл бөлінеді.