Аннотация
Мақалада әдебиетші ғалым Рахманқұл Бердібайдың сан тарапты ғылыми еңбектерінің ұлттық әдебиеттанудағы зияткерлік сипаттағы маңызы қарастырылады. Коммунистік жүйе қысымындағы қазақ әдебиеті тарихының аса ділгір тақырыптарын ұлт тарихында қордаланып қалған көкейкесті мәселелермен тығыз байланыста талдауының өзектілігі сараланады. Тоталитаризм қыспағындағы әдеби мұраға, ұлттық құндылықтарға, Отан тарихынындағы қилы кезеңдерден жазылған тарихи тақырыптағы І.Есенберлин романдарына елдік мүдде тұрғысынан объективті баға беруінің бүгінгі тәуелсіздік дәуіріндегі маңызы байыпталады.Ғылыми зерттеулеріндегі талдауларында филология және тарих ғылымдарының өзара тоғысып жатуының келелі сипаттары айқындалады. Әдебиеттанушы ғалым Р.Бердібайдың ғылыми еңбектері ұлттық әдебиеттанудың аса өзекті мәселелерін кешенді талдауымен маңызды. Ғалым еңбектерінде зерттеу нысанына алынған тақырыптар жүйесі өте ауқымды. Әдебиетші қазақ әдебиетінің тарихымен қатар фольклористика, түркітану бағытындағы күрделі зерттеулер жүргізді. Қазақ әдебиетінің өзекті мәселелері Отан тарихының келелі мәселелерімен сабақтастықта зерделеген ғалым әдебиеттанумен қатар тарих ғылымының ғылыми қағидаттарын басшылыққа алып отырды.Мақала XX және XXI ғасырлар тоғысындағы зияткерлік тарихты қазақ тарихшылары мен әдебиетшілерінің еңбектері арқылы пәнаралық зерттеу тұрғысынан байыптауға мүмкіндік береді.