Аннотация
Бұл мақалада фольклорлық дискурс қазақ тіл білімінің заманауи бағыттары – дискурс теориясы мен корпус лингвистикасы тоғысында кешенді түрде қарастырылады. Зерттеудің негізгі назарында фольклорлық мәтіндердің тілдік, құрылымдық және функционалдық ерекшеліктерін ұлттық корпус материалдары негізінде айқындау мәселесі тұр. Фольклорлық дискурс жанрлық әртүрлілігімен, тұрақты құрылымдарымен, бағалауыштық жүйесімен және мәдени кодтарды жеткізу қабілетімен сипатталатын күрделі коммуникативтік құбылыс ретінде талданады. Зерттеу барысында қазақ тілінің ұлттық корпусындағы фольклорлық мәтіндердің репрезентациясы қарастырылып, олардың жиілік, вариативтілік және контекстік қолданыс ерекшеліктері анықталады. Сонымен қатар, фольклорлық материалдарды корпусқа енгізу, таңбалау және жүйелеу мәселелері талданып, осы үдерістің ғылыми-әдіснамалық негіздері ұсынылады. Жұмыстың мақсаты – фольклорлық дискурстың корпустық моделін сипаттау және ұлттық корпус құрамындағы фольклорлық деректердің ғылыми әлеуетін айқындау. Зерттеу нәтижелері қазақ тілін цифрландыру жағдайында фольклорлық мұраны сақтау мен талдаудың тиімді тетіктерін көрсетуге мүмкіндік береді.