Аннотация
Бәсекеге қабілетті білім кеңістігін құруға бағытталған Қазақстан Республикасының «Білім туралы» Заңында (Қазақстан Республикасының Білім туралы Заңы,2017): «Білім беру жүйесінің басты міндеті – ұлттық жəне жалпы адамзаттық құндылықтар, ғылым мен практика жетістіктері негізінде жеке адамды қалыптастыруға, дамытуға жəне кəсіптік шыңдауға бағытталған сапалы білім үшін қажетті жағдайлар жасау; жеке адамның шығармашылық, рухани жəне күш-қуат мүмкіндіктерін дамыту, адамгершілік пен салауатты өмір салтының берік негіздерін қалыптастыру, даралықты дамыту үшін жағдай жасау арқылы ой-өрісін байыту», - делінген болатын. Тізілген міндеттерді жүзеге асыру оқытудың жаңа технологияларын енгізу мен оқыту жүйесін дамытуды көздейді. Әсіресе, мемлекеттік тілді оқыту кезінде сапалы білім алған, құзыреті мен танымдылығы жоғары, бəсекелестіктің тегеурініне төтеп бере алатын мамандар ғана кемел болашаққа жол ашады. Осыған сәйкес зерттеу мақаламыз студенттердің кәсіби қабілеттеріне тірек болатын құзіреттіліктерді қалыптастыру арқылы тілдік білімін тереңдету мен жетілдіру мәселелерін қарастырады. Сонымен қатар, отандық тіл мамандары мен ғалымдардың қазақ тілін оқыту әдістемелеріне қатысты жазылған бағалы еңбектері басшылыққа алынып, мемлекеттік тілді оқыту барысында студенттерде қалыптасатын құзыреттіліктердің алты түрі анықталады. Аталған құзыретттіліктердің әрқайсысына жеке дара талдау жасалып, олардың ғылыми және кәсіби бағыттағы атқарушылық мәні мен мазмұны ашылады.