Аннотация
Бұл мақалада ХХ ғасырдың басында жарық көрген "Қазақ" газетінің оқу-білім саласына қосқан үлесі жан-жақты қарастырылады. Газет қазақ халқының сауатсыздығын жою, ұлттық білім беру жүйесін қалыптастыру және ағарту саласын дамыту мәселелерін көтерді. "Қазақ" газетінде жарияланған мақалалар тек білім беру жүйесіне қатысты ақпарат беріп қана қоймай, сол кездегі саяси-әлеуметтік ахуалды сипаттап, халықтың сауатын арттыруға бағытталған маңызды дереккөздердің бірі болып табылады.Зерттеу жұмысы "Қазақ" газетінің білім беру ісіне тигізген ықпалын талдай отырып, оның мазмұнын тарих пәнінде оқыту әдістеріне бейімдеу жолдарын ұсынады. Газетте көтерілген негізгі тақырыптар –ұлттық мектептердің ашылуы, мұғалім даярлау, оқулықтар мен оқу құралдарын әзірлеу, қазақ тілінде білім беру қажеттілігі, сондай-ақ білім жүйесін қаржыландыру мәселелері. "Қазақ" газетіндегі білімге қатысты мақалаларды талдау арқылы зерттеу жұмысы олардың тарих пәнін оқытудағы маңызын анықтайды.Зерттеу мақсаты –"Қазақ" газетінде жарияланған білімге қатысты мақалаларды жүйелі түрде талдау, олардың мазмұнын ашып көрсету және қазіргі білім беру үдерісінде қолдану жолдарын айқындау. Зерттеудің маңыздылығы –ұлттық баспасөздің білім беру саласына қосқан үлесін көрсету және оның идеяларын қазіргі оқыту жүйесіне бейімдеу. Сонымен қатар, зерттеу жұмысы "Қазақ" газетінің деректерін тарих пәнін оқытуда пайдалану арқылы оқушылардың тарихи санасын дамытуға ықпал етуге бағытталған.