Аннотация
Мақалада қазақ тіл ғылымындағы жаңа парадигмамен байланысты бағыттар мен ізденістерден туындайтын мәселелерге назар аударылып, қазақ сөз этикетінің стереотиптік қырлары айқындалады. Дәстүрлі мәдениетте кездесетін, тілдік қарым-қатынаста стереотипке айналған коммуникативтік этикеттегі қаратпа атауыштардың қоғам мүшелерінің әлеуметтік ерекшеліктерімен байланысты қырларына тоқталдық. Этикеттік қаратпа атауыштар, бір жағынан, әмбебап сипаттағы стереотиптер болса, екінші жағынан, олардың коммуниканттардың жас ерекшелігі, жыныс айырмашылықтары, әлеуметтік мәртебесі сияқты өзгешеліктермен байланысты мәнге ие стереотиптік сипатына талдау жасадық. Сонымен қатар соңғы кездерде пікірталас сипатындағы қаратпа атауыштық этикеттердің қолданыстағы түрлеріне талдау жасалып, мән-мағынасы ашылады. Сондай-ақ ескіден келе жатқан дәстүрлі этикеттік атауыштар әлеуметтік стереотип, ментальді стереотип, этномаркерлі стереотипке жататын түрлеріне тән ерекшеліктері коммуникативтік жағдаятпен байланысты екені көрсетіледі. Этикеттік стереотиптерді талдау барысында қаратпа атауыштардың әлеуметтік-қоғамдық деңгейден мән алып, мәдени-этикалық құндылықтардың қатарынан орын алғаны айқындалды. Этикеттік стереотиптер – қоғамда адамдардың өзара қарым-қатынасында қалыптасқан, күтілетін мінез-құлық үлгілері. Олар мәдениетке, дәстүрге, жасқа, жынысқа, әлеуметтік мәртебеге байланысты пайда болады және күнделікті өмірде бағыт-бағдар береді. Этикеттік стереотиптердің оң жағы – қарым-қатынасты жеңілдетуі, түсініспеушілікті азайтуы. Алайда олар кейде шектеу қойып, даралықты елемеуі мүмкін. Түрлеріне келсек, біріншісі – мәдени стереотиптер. Мысалы, амандасу формасы, қонақ күту, үлкенге құрмет көрсету. Екіншісі – кәсіби этикет стереотиптері: қызметтік хат жазу, басшылықпен сөйлесу, жұмыс орнындағы киім үлгісі. Үшіншісі – жыныстық-рөлдік стереотиптер, яғни ер мен әйелге тән деп саналатын мінез-құлық нормалары. Төртіншісі – жас ерекшелігіне байланысты стереотиптер: балалардың, жастардың, қарттардың өзін ұстау ережелері. Сонымен қатар, цифрлық этикетке қатысты стереотиптер де бар, олар онлайн қарым-қатынаста сыпайылықты реттейді. Этикеттік стереотиптерді түсіну – саналы, құрметті қоғам құрудың маңызды шарты. Бұл тақырыпты талдау жеке жауапкершілікті арттырады, сын тұрғысынан ойлауға үйретеді және әртүрлілікке ашық болуға көмектеседі. Сондықтан этикет нормаларын икемді қолдану, құрмет пен теңдікті сақтау қазіргі заман үшін аса өзекті мәселе болып табылады. Ол адамдар арасында сенім, түсіністік және ынтымақтастық қалыптастырады, ұзақ мерзімді әлеуметтік байланыстарды нығайтады, тұрақты дамуға ықпал жасайды және адамдар арасындағы қарым-қатынастарды тілдік коммуникацияны реттеп отырады.