Аңдатпа
Бұлтты есептеулер пайдаланушылар тарапынан тікелей басқарусыз, талап бойынша деректер қоймалары мен есептеу қуаттары сияқты желілік ресурстарға қол жеткізу құралдарын білдіреді. Қазіргі уақытта компаниялар клиенттерге интернет арқылы бірыңғай платформа ұсынатын мемлекеттік және жеке деректерді өңдеу орталықтарын пайдаланады. Сонымен қатар, бұлтты қызметтерді оңтайландыру үшін есептеулер мен ақпаратты сақтауды соңғы пайдаланушыларға жақындатуға мүмкіндік беретін перифериялық есептеулер (edge computing) белсенді қолданылады. Алайда, бұлтты есептеулерді пайдалануда клиенттер үшін қауіптер мен осалдықтарға байланысты киберқауіпсіздік проблемалары туындайды. Бұл мақалада бұлтты есептеулер мен бұлтты қызметтердің киберқауіпсіздігін қамтамасыз ету мәселелеріне арналған ғылыми жарияланымдарға талдау нәтижелері көрсетілген.