Аңдатпа
Аңдатпа. Бүгінгі қазақ театр режиссурасының бағыттары мен даму перспективаларын анықтауға арналған зерттеулер отандық театртанудағы басты ғылыми мәселелердің қатарынан орын алады. Қазіргі кезде заманауи әлемдік театр тенденцияларын жаңа көзқараста танитын, тәуелсіздік пен елдік рухта өнер құбылыстарын жасауға ұмтылған қазақстандық жаңа буын режиссерлердің қолтаңбасын анықтау тақырыптың өзектілігін құрайды. Әдістер: зерттеу жұмысының әдістемелік негізін жалпы өнертанушылық ұстанымдармен қатар қойылымды талдаудың хронологиялық, театртанушылық, мәдени сараптамалық сондай-ақ құрылымдық тәсілдері құрайды. Жұмыста режиссерлердің қазіргі шығармашылық ізденістері салыстырмалы-сараптамалық, ғылыми жүйелеу, өнертанушылық талдау және кешенді зерттеу әдістерін қолдану арқылы жүргізілді. Міндеттері: әлемдік театр дамуындағы парадигмалық өзгерістер мен өнерді зерделеудің қазіргі жағдайында қазақ театр режиссурасындағы жаңа құбылыстар қарастырылады; заманауи медиатехнологиялар мен театр өнері арасындағы үндестіктің күшейуі спектакльдің жаңа формасы мен оның контентін ерекше жасауға мүмкіндіктері талданады; режиссурада, сценографияда, актерлік өнерде бүгінгі театрдың сан-алуан бейнелік тілдерінің пайда болуы және оның актерлік өнердің жаңа бағытта дамуына әсерлері анықталады. Нәтижелер: Дина Жұмабай, Фархат Молдағали, Елік Нұрсолтан, Әлібек Өмірбекұлы, Аридаш Оспанбаеваның қойылымдарындағы постдрамалық үрдістердің айшықтары мен театр эстетикасындағы режиссерлік тың ізденістері айқындалды; аталған режиссерлердің спектакльдері визуалды метафораларымен, символдарымен, семиотикалық белгілерімен бүгінгі қоғамда орын алып отырған мәселелерді өткір театрлық тілмен айта алу даралықтары зерделенді. Зерттеудің тәжірибелік маңызы: қазақ театр режиссерлерінің драматургиялық материалмен және актерлермен жұмыс істеу тәсілдері Орта Азия театр кеңістігіндегі басқа театрлар өзіндік тәжірибе ретінде қолданысқа енгізуге болатындығында және қазақ театрының әлемдік театр үдерісінде болу үшін әлі де шығармашылық дамудың қажет екендігін ескеруде. Сонымен қатар, оқырман халықаралық деңгейде қазақ сахна өнерінің әлемдік театрдағы өзекті идеялар мен формаларды пайдалана отырып, қазақ режиссерлерінің театрдың ұлттық келбетін жоғалтпай жұмыс істеп жатқандығымен таныса алады.