Аңдатпа
Мақалада қосымша білім беру педагогтерінің үздіксіз кәсіби дамуын баланың қызығушылығын құзыретке, портфолиоға және білім беру-кәсіби траекторияға айналдырудың жүйелік шарты ретінде қарастыратын тұжырымдамалық модель ұсынылады. Зерттеудің мақсаты - қосымша білім беру саласындағы педагогтің кәсіби капиталын құзыреттілік, тәлімгерлік және зерттеушілік мәдениет бірлігі негізінде құрылымдау. Әдіснама теориялық-аналитикалық сипатта болды: капитал теориясы, қабілетті талантқа түрлендіру моделі, педагогтердің кәсіби дамуы, коучинг, мектептен тыс бағдарламалар және креативті ойлау жөніндегі халықаралық еңбектер мақсатты түрде іріктеліп, тақырыптық синтез жасалды. PISA-2022 және UNESCO деректері контекстік дәлел ретінде пайдаланылды. Нәтижесінде қосымша білім берудің капиталды түрлендіру тетігі сипатталып, педагогтің кәсіби траекториясының үш өзара байланысты тірегі негізделді. Тәлімгерлікті практикаға кіріктіруге арналған 6E циклі және «бір сұрақ - екі дерек көзі - бір өзгеріс» қағидасына негізделген төрт апталық шағын зерттеу циклі әзірленді. Ұсынылған модель педагогтің кәсіби оқуын бір реттік курстардан жұмыс орнындағы жүйелі, бірлескен және дерекке негізделген жетілдіруге көшіреді. Модель тұжырымдамалық сипатта болғандықтан, оның тиімділігі квазиэксперименттік және аралас әдісті зерттеулерде тексерілуі қажет.