Аңдатпа
Мақалада «Мәңгілік ел» идеясының тарихи бастауларына мән беріледі. Қазақ тарихының әртүрлі кезеңдеріндегі оқиғалар ашылады. Қазақ ойшылдары мен ұлт қайраткерлерінің еңбектеріндегі «Мәңгілік ел» идеясымен ұштасатын ойларға сараптама жасалады. «Мәңгілік ел» идеясы тек Қазақстан Республикасының егемендігі жылдарында ғана пайда болған жоқ. Әр тарихи кезеңде қазақ ойшылдары «Мәңгілік ел» туралы өзіндік пікірлерін білдіріп отырған. «Мәңгілік ел» идеясы түркі дәуірінен бастау алады және бүгінге дейін жалғасуда. Мақалада авторлар Күлтегін жазбасын талдайды. Күлтегін жазбасындағы «Мәңгілік ел» идеясының мәнін ашады. Ортағасырлық әл-Фараби сияқты ойшылдар еңбектеріне шолу жасалады. Сонымен қатар ХХ ғасыр басындағы ұлт қайраткерлерінің еңбектері мен қоғамдық қызметтері талданады. Ұлт қайраткерлерінің еңбектері де «Мәңгілік ел» идеясымен тығыз байланысты деп айта аламыз. Тіпті Кеңестік билік жылдарында өмір сүрген ақындар мен жазушылар еңбектерінде де «Мәңгілік ел» идеясы көрініс тапты. Осы мәліметтерді басшылыққа ала отырып, қазақ халқы үнемі жарқын болашақ және ұрпақтардың амандығы сияқты өзекті мәселелерге үлкен мән берген. Мұндай өзекті мәселені талдау және нақты тұжырым жасау бүгінгі ғылым үшін өзекті тақырыптардың бірі болып қала береді.