Аңдатпа
Қазіргі қоғамда жаңа технологияларды, ғылыми процестерді басқару әдістерін игеру аса маңызды болып отыр. Бұл арқылы мұғалімдер оқушылардың білім алуға қызығушылығын арттырып қана қоймай, өз бетінше білім алуға мүмкіндік береді. Осы орайда, жаңадан шығып жатқан ақпараттық технологияларды мектеп мұғалімдерінің білу деңгейі, сол арқылы оқушыларға қажетті білімді бере алуы, мұғалімдердің кәсіби білім деңгейін көтеруде атқарылуы тиіс шаралар сынды мәселелер туындайды. Мақалада қазіргі білім беру жүйесінде орта буын оқушыларын оқыту кезінде олардың осы уақыт ішінде алған білімдері мен өмірлік тәжірибелерін ескере отырып, оларды өз бетінше іс-әрекет жасайтын, білімді, шығармашыл тұлға дайындауда негізгі мектептің информатика курсына толықтырылған шынайылық технологиясын енгізу туралы баяндалған. Бұл технологияны енгізуде кездесетін кедергілерге тоқталып, толықтырылған шынайылық туралы информатика пәні мұғалімдерінен сауалнама алынды. Зерттеуде сауалнама сұрақтары арқылы деректерді жинау мен талдауды қамтитын сандық зерттеу әдісі пайдаланылды. Сауалнама бойынша R бағдарламасы арқылы талдау жасалынды. Сонымен қатар, мұғалімдерді арнайы курстарда толықтырылған шынайылық технологиясы туралы білімін жетілдіру және оны жеткілікті деңгейде меңгеріп, оқушылардың пәнге деген қызығушылықтарын арттыра отырып, білім сапасының артуының әсерлері жайлы баяндалған.