Аңдатпа
Қазіргі уақытта адамның физиологиялық жағдайын нақты уақыт режимінде бақылау денсаулық сақтау, спорттық медицина, өндірістік қауіпсіздік және әскери мониторинг салаларындағы маңызды міндеттердің бірі болып табылады. Осыған байланысты Internet of Bodies (IoB) технологиялары негізінде жұмыс істейтін интеллектуалды мониторинг жүйелеріне қызығушылық артып келеді. Мақалада адамның биосигналдарын жинауға, өңдеуге және қашықтықтан бақылауға арналған мультисенсорлық жүйені әзірлеу мәселелері қарастырылады. Ұсынылған жүйе жүрек соғу жиілігін, қандағы оттегі қанығуын, дене температурасын, қозғалыс белсенділігін және геолокация параметрлерін бақылауға мүмкіндік береді. Аппараттық платформа ретінде ESP32 микроконтроллері, MAX30102, AD8232, DS18B20, MPU6050 және GPS модульдері пайдаланылды. Деректерді беру үшін MQTT хаттамасы мен Wi-Fi байланысы қолданылды. Эксперимент нәтижелері ұсынылған жүйенің биосигналдарды нақты уақыт режимінде сенімді бақылауға мүмкіндік беретінін көрсетті.