Аңдатпа
Мақалада жоғары оқу орнындағы кәсіби даярлық кезеңінде болашақ педагог-психологтар мен психологтардың лидерлік әлеуеті мен эмоционалды интеллектісін дамытудың психологиялық детерминанттары қарастырылады. Зерттеудің мақсаты –кәсіби даярлық үдерісінде студенттердің лидерлік әлеуеті мен эмоционалды интеллектісі арасындағы өзара байланысты анықтау және олардың дамуына ықпал ететін психологиялық факторларды теориялық және эмпирикалық тұрғыдан негіздеу. Теориялық бөлімде «лидерлік» және «лидерлік әлеует» ұғымдарының мазмұны талданып, олардың болашақ мамандардың кәсіби қалыптасуын-дағы рөлі айқындалады. Эмпирикалық зерттеуде Е. Жариков пен Е. Крушельницкийдің «Лидерлік қабілеттер диагностикасы» әдістемесі, Н. Холлдың эмоционалды интеллект тесті және Л. В. Мищенконың оқу іс-әрекетіне қанағаттану сауалнамасы қолданылды. Зерттеу нәтижелері оқу іс-әрекетіне қанағаттану деңгейі мен лидерлік әлеуеттің дамуы арасында оң байланыс бар екенін көрсетті. Сонымен қатар, лидерлік әлеует эмоционалды интеллектінің қалыптасуы мен дамуына ықпал ететін маңызды психологиялық фактор ретінде анықталды. Алынған нәтижелер жоғары оқу орындарының білім беру үдерісіне лидерлік пен эмоционалды интеллектіні дамытуға бағытталған бағдарламаларды енгізудің маңыздылығын дәлелдейді.