Аңдатпа
Ғылыми мақала косметика және фармацевтика өнеркәсібінде қолдану мүмкіндігі жоғары, табиғи антиоксидант – астаксантин өндірісін ұлғайту мақсатында Haematococcus pluvialis микробалдырларын өсіруді оңтайландыру әдістерін зерттеуге арналған. Аталған тұтынушылық өнімдерге сұраныстың артуымен астаксантин нарығы 2023 жылы 921,3 миллион АҚШ долларынан асады деп күтілуде. Жасыл микробалдырлардың бір түрі Haematococcus pluvialis антиоксиданттық қасиеттері бар табиғи астаксантиннің ең үлкен көзі ретінде танылған. Синтетикалық астаксантиннің қауіпсіздігі және оның табиғи аналогымен салыстырғанда төмен антиоксиданттық белсенділігі және ілеспе қоспалардың болуы туралы алаңдаушылық жағдайында Haematococcus pluvialis жоғары деңгейлі нарық үшін таңдаулы көз болып табылады. Мақалада Haematococcus pluvialis-ті фотобиореактор және ашық жүйе арқылы өсіру әдістері зерттелді, астаксантиннің шығымына әсер ететін оңтайлы өсу жағдайлары көрсетілген. Зерттеу жұмысында қоректік ортаның құрамы, қолайлы өсіру параметрлері және өсіру ұзақтығы сияқты өсірудің әртүрлі параметрлері зерттелді. Ұсынылған зерттеу нәтижелері табиғи астаксантиннің өндірілуін қамтамасыз ететін Haematococcus pluvialis өсірудің оңтайлы шарттарын анықтауға мүмкіндік береді. Ұсынылған оңтайландыру әдістері астаксантин өндірісінің тиімділігін арттыру және әртүрлі қолданбалар үшін оның қолжетімділігін жақсарту үшін өнеркәсіпте кеңінен қолданылуы мүмкін. Алынған нәтижелер, сондай-ақ өндірілген астаксантиннің сапасы мен санын жақсарту үшін микробалдырларды өсірудің жаңа стратегияларын әзірлеу бойынша әрі қарай зерттеулерге негіз бола алады.